trevlig Jultid

liebi Grüess us Åre ♡
hie hätts Schnee... ;)

Skåneleden vo Glimåkra uf Osby

Ds halbwägs schönä Wätter het üs umi mal drzu ermutigt chli usi ga z'luufä. Mir si hüt ufem Skåneleden gsi.
Dr Skåneleden isch äs Wanderweg-Netz wo sech dür ganz Skåne zieht u ca 1000km leng isch. So wiit si mir hüt nät glüffä- aber o immerhin 20km. D'Schwirigkiit am Ganzä isch ä Wanderig so z'planä, dasmä denn cha luufä wos halbwägs hell isch usnä. Das hisst, vor em halbi Nüni muesch nät gah u späteschtens am halbi Vieri söttmä de scho zrugg si. Äs het aber doch nu für nes paar Bilder glängt unterwägs:

We si da holzä, chönntmä o minä ä Bombä sigi igschlagä...

mir zügle…!!

Wäge unüberbrüggbare Differenze mit üsem Vermieter sueche mir üs so schnäu wi müglech ä anderi Unterkunft. Dr Mister het sich EXTREM dran gstört, dass mir Bsuech hei iglade ohni ihn drüber ds informiere u somit o - was no viu schlimmer isch - ohni für die Fründin meh Mieti ds zahle. Aber är isch de ganz sicher nid uf üses Gäld agwisä. Lut u dütlech, mit etliche Beleidigunge über di typesch schwizerischi Machart, het är üs über sis agäbleche Rächt uf meh Gäld informiert. Da mir nüt vo däm „schwedische" Bsuechsverbot wüsse, hei mir üsi Schwedische Krone nid vor luter Fröid id Luft gworfe. Was widerum bedütet, dass dr Mister ä gmeinsami Ussprach u ä Kompromisslösig ablehnt.

Anyway, die überwäutigendi Gastfründschaft u Hiufsbereitschaft wei mir nid witer strapaziere. Mir hei üs entschide, dass mir uf Ändi Monet uszieh. Mir gö dervo us, dass mir o ohni ausspioniert, diskriminiert u belediget ds wärde schöni Wintermonate im Skåne lan chöi verbringe.

Wichtig: Bitte ke Post meh a die agäbeni Adrässe schicke- mögte däm Löu dr Wiehnachtsschoggi vo ganzem Härze nid gönne. We nu öpis ufem Wäg sötti si, de mäldet öich doch bitte!

Älg Safari

Da mir das Wucheänd Fründin-Bsuech us dr Schwiz hei gha, hei mir öpis so richtig schwedischs wöue ungernäh.  Mir hei am Samsti ä Elch-Trip gmacht. Mitem Outo fahrt me düre 13 Hektar gross Park u cha „die Könige der Wälder“ us nechster Nächi beobachte. 

;)

Das isch ä Spass gsi! Martina, schön bisch du da gsi, mir hei di Zyt mega gnosse <3

Ä Summer lang hani ufä Winter gwartet....

Endlich ischer da dä Winter. Geschter isches ischchalt gsi, u hüt hets dr erscht Schnee gä.

Malmö

Ds letzte Wucheänd hei mir in Malmö verbracht. 

Malmö isch di drittgrössti Stadt vo Schwede. 30 000 Einwohner mit 150 verschidene Nationalitäte läbe hie. U ma cha dervo usgah dass es meh wärde… Sowohl am Hafä, wie o im Bahnhof warte Mönsche u hoffe druf, ufgnoh ds wärde.

Diräkt hinger em Hafe, im ehemalige Werftgebiet „Västra Hamnen“ isch i de letztä Jahr äs moderns Wohn- und Arbeitsquartier entstande. Mittupunkt biudet dr „Turning Torso“. Mit 190 Meter isch es ds erste u ds einzigste Hochhus in Schwede.

Sit em Jahr 2000 isch d Stadt über di 16 km längi Öresundbrücke mit Kopenhagen verbunde.  Am Strand vo „Ribersborg“ het me lut Reisefüehrer ä wunderbare Bilck uf ä Öresund und uf Kopehage. Mir hei äber bi däm Herbstwätter d Brügg u d Stadt  nume chönne erahne…

 D Altstadt „Gamla Staden“ wird vomne Kanal umgäh u  isch ds Härz vo Malmö. Einersits historisch, andersits präge unzähligi Shopingcenter, Läde u Beizli ds Stadtbiud.  

Rathus

Ds Schloss vo Malmö "Malmöhus" isch hüt ds Nationalmuseum. Ä Spaziergang im Schlosspark am Sunndinami het üsen müede Füss no dr Räst gäh... :)

Samstigsusflug

Mir si ga paddlä ufä Immelnsee. Dä See ich risig, är het ä Grössi vo 22 km² was fasch so gross isch wiä dr Brienzersee. Ihr chöntnäch vorstellä,  dass mä da i 3 Stund nät allzuvil vo däm Gebiet gseht. U glich hi mir es paar Idrück für öich:

Zwar ki Elch, aber immerhin... ;)

Nüis Hobby...?!

Geocaching 

Was isch das überhuupst:
Äs git Lüüt diä düä äs Böxli mit ämnä Logbuch drin (das isch so öpis winis Gipfelbuch) im Wald oder o schüsch umä vrsteckä. När düä di Lüt dr gnau Standort vo däm Böxli uf ärä Websitä priisgä. Das machäsi mittels Längä -u Breitägrad vo üsem Planet. 
Zum Bispiil: 56°15'21.49'' N, 14°04'55.37''O, das werä di gnauä Koordinatä vo üsem Hüsli. 
Di Koordinatä gitmä imnä GPS-fähigä Grät i u leht sich dert härä la führä. Wärs gneuer weti wüssä: https://www.geocaching.com/

So gseh das när öpä us:

Ds alleribeschti dran isch aber, dasmä ufem Wäg zu dänä Geocaches zu sehr schönä Ortä chunnt u sehr vil Ziit usna cha verbringä:

Ma gseht o nu guet erhalteni Occasioni ;)

Ä liebä Gruss vo üs :)

Herbscht i de Wäuder vo Skåne

Mir gniesse d`Streifzüg dür d Wäuder, entlag vo Bechli, Flüss u Seeä ir Umgäbig vo Broby. Egau i weli Richtig mir ds Dorf verlöh, früecher oder speter si mir immer irgendwo am ne See- u zwar immer amne angere u meistens muetterseeläelei.

Mir wärde mit wunderbarem Herbschtwätter verwöhnt 

u dir wärdet jtz mit wunderbare Herbschtbiuder verwöhnt ;)

Dorf Broby

so macht jogge Spass... ;) 

We diä öper gärn het, chönntä mir schüsch äs paar schickä ;)