Schliifschuänä

vor 3 Monet... 

hüt!

Tydingesjön, ca. 300 Hektarä

dr Adrang het sich i Gränze

o das isch müglech... Platz hetts.

Vångabacken

Üsi nüiä Nachbuurä u Vermieter hi üs gfragt ob mir nät mal ihrem Sohn chönntä chli zigä wiä Snowboardä. Är cha scho chli Schifahrä aber Snowboardä würdi ihnä o gluschtä. Da hi mir nu so gärä zugstimmt. Z'letscht Wuschäend het duä z'Wätter passt. Dr Bub het nu grad is gmerkt, dass das Snowboardä nät halb so ifach isch, wiä är sich das het denkt. Aber glichwohl het är nät grad ufgä, het probiert u probiert. U isch chlichli Fän worde vo däm Snowboardä. Am Abä, hi mir när üsnä Vermieter nu richtigs Schwizerässä serviert. D' Idee, dasmä Racletteches mit Häblä cha ässä, hi si am Afang komisch gfundä. Aber du kurzum gseh, dass das öpis vom Beschtä isch wos git ;). Mir hi also ä supergutä Snowboardsamschtig mit Raclette u Wisswii ka. Was wotmä da nu meh...?? :)

Vångabacken - Das isch ä chlini Skilift ca. 20km vo Glimåkra. Ma chönnti jitz sinnä, dasmä a somnä chlinä Schilift zwar scho cha lerä Schifahrä oder Boardä, aber das mas nät wiit bringt. Das isch nät ä so! D' Hanna Westman isch vo hiä. Siä het ires Weltcup-Debüt am 15.1.2016 am Slalomrennä ds Flachau gä. Leider het siä sich mittlerwilä scho verletzt... (http://www.vangabacken.com/)

Nu äs paar Bilder vo däm Tag:

Hanna Westman (http://www.kristianstadsbladet.se/)

Besök #2

Vom 2. bis am 6. Januar si mini Eutere bi üs ds Bsuech gsi. Mir hei üs sehr uf di gmeinsami Zyt gfröit.
Trotz em Winter i dere usprägte Summerregion hei mir paar tolli Usflüg chönne ungernäh- d Natur isch ja immer da... Mir hei ä Tour ar Ostküste vo Åhus bis Simrishamn gmacht. Z' Wätter isch zwar gut gsi, aber iischchaut. Äs isch so chaut gsi, dass ar Ostsee der Schuum vo dä Wäuä am Strand isch gfrorä. Ähnlech het sich das bi üsne Ohre, Händ u Füess verhaute :) Am nächste Tag hei mir d Wäuder u d Umgäbig ir Nachbarschaft erkundet u bim Severin ä Budäfüehrig übercho. 
Am 3. Tag si mir gägä Norde, Richtig Växjö (schwedisch usgsproche: Wechjöö) dür Småland is Glasrich. Ufem Heiwäg no ä chlinä Abstächer uf Älmhult- IKEA the City! Ganz nach dä Wort vom Vätu: "We scho IKEA, de ds Schwedä." ;)
U am nächste Morge hets ds Malmö scho wider gheisse, Abschid näh. 
Mir hei di Tagä mitenang sehr gnossä. Hei viu gässe u trunkä, glafäret u gjasset. Merci viu viu Mau! Schön sit dir da gsi! Mir gniesse immerno Greyerzer, Landjäger, Schoggi, Läbchueche u Änischräbeli. U fröie üs uf ds Fondue u ds Raclette wo no uf üs wartä... mmmmhh...

Åhus

Svartaberga- Granitsteibruch

Glasrich, Växjö

anstatt ä Wiehnachtsboum, Malmö

Åre

Mir hei üs uf d Suechi nachem Winter gmacht- mitem Nachtzug vo Stockholm Richtig Norde. Denn si mir no überzoge gsi, dass sich dä 1000km nördlech vo üs versteckt. D Wiehnachtswuche wie mir schliesslech mit, u nid ohni Schnee erläbe. 

Morge am Nüni, grad knapp häu, si mir mit Sack & Pack u Schiischueh ufem iisige Peron gstange– välkomna i Åre.

Mir hei ds B&B gsuecht u -chli usserhaub vom Zäntrum- gfunge, hei Schii gmietet u üs ufe erst Tag uf dr Piste gfröit. 

Åre isch di Hochburg vom Alpinschiisport in Schwede. Rund um Jämtlands höchste Bärg, em Åreskutan (1420m), ligt ds Skigebiet. 91 Pistekilometer, 32 Bahne u immer besti Ussicht ufe Åresjön. Winter isch leider no nid so richtig gsi, aber immerhin afä a Afang- drum meistens:

D Piste si afangs Wuche no tiptop gsi. Hei sich aber de mit de vile Lüt über Wiehnachte, em Räge u nume weni Schnee zu „eisig- knapp fahrbar“ verwandelt. 

Während de chürziste Tage isch d Sunne circa am 10i ufgange u am haubi3 unger. Sunnehöchststand isch knapp überem Horizont gsi. Derfür het me glichzitig Morge- und Aberot chönne bestune. Mir heis gnosse nach mehrere Wuche Näbu u Räge widermau d Sunne ds gseh! 

Åre het es chlises aber sehr schöns Dorfzäntrum. Luxushotels reihe sich näbe roti Houzhüser. Mittupunkt isch die 1910 erbouti Standseilbahn, wo no hüt diräkt vom Dorfplatz d Lüt uf d Piste bringt.

Åre isch Weltcup u WM-Ustragigsort. 
Dr Weltcuphoger isch Tag u Nacht belüchtet und isch ab de 3 am Nami di einzeisti Auternative - näbst em Apres Ski...

Mir hei d Wiehnachtstäg gnosse u hei üs extrem über aui Nachrichte u Wiehnachtsüberraschige gfröit.