Pumuckl -unterwägs daheim: März 2016

Folk Race, isch wiä dr Namä scho siit, für alli. Äs isch so chli ähnlich wiä Rallyecross. Im Durchschnitt isch mindeschtens 1s Göpi ä Ranzä gangä, wil entwäder dr Motor di ganzi Sach nät het erlitä oder wil dürnä Crash, d'Lenkig kaputt isch gangä. Also richtig Action!

Startä tuä maximal 6 Auto mitenand. Im Gsamtä gits 3 Rundeni z'fahrä, u när chömmä grad aschliessend di nächstä 6. Ma macht 3 Lüüf. Di beschtä 18 vo dänä 3 Lüüf chömmä i Final, wo nu unterschidä wird zwüschä A,B,C Final. Di beschtä 6, also di wo i dänä 3 Lüüf di beschtä Platzierigä u nu äs heils Outo hi si im A-Final u.s.w.

Dr Gwinner vom A-Final, mues sis Outo zwangslüfig vrchufä!! U zwar für 6500kr, was ca 750.- isch. Di wo das wi chufä, tüä sich für 200 kr (24.-) inä Lotterie ichufä, wo när dr Chüfer usglost würd. Das hisst, das d'Fahrer d'Chöschtä für ihri Fahrzüg müglechscht tüüf wi haltä, wil mä wot ja nät ä Ferrari für 750.- vrchufä.

Für d'Sicherhiit, mues jedes Outo mit Bremslicht, Schutzchefig u Rennsitz usgrüschtet si. Zudäm isch Schutzchlidig, also nät brennbari Chlidig u ä Helm vorgschribä.

Also ganz churz gsit. Ä höllä suberi Sach :) :)

D Zyt vergeit – es haubs Jahr isches här sit mir abgreist si. Mir finde das isch ä guete Momänt ä Rückblick vo A bis Z ds mache. Mir stuune, lachä, diskutiere u mängisch rege mir üs sogar chli uf, über das wo ds Läbe hie so mit sich bringt. Aber läset säuber!

Armaturteknik
Mi Arbiitsplatz fürnes halbs Jahr. Mischtens hani Ventil montiert wo us Kupferlegierigä si. Di brucht mä im Schiffsbou, zum Bispil hani Ventil fürd Carneval-Redderei bouä wo unter anderem d'Queen Mary II betribt. I ha o mitgholfä d'Montageprozässä chli effizienter z'machä u d'Qualität z'vrbesserä. Das isch nät immer ganz ifach gsi, wil investierä hetmä igentli nät welä u d'Qualität isch halt ninä so wi ir Schwiiz :)
Blog

Es isch für üs schön ds gseh, dass nach wi vor so viu Lüt üsi Erläbnis tüe mitverfouge. Bis jtz isch di Site 2500 mau agluegt worde. Immer spannend für üs isch ds gseh, wo dir ide Feriä sit ;) Danke für die vile liebe Komplimänt wo mir für üsi Fotos überchöme. Mir verspräche, dass es im 2. Haubjahr spannender wird für öich...

Citytrips
Nachdäm mir Kopehagen, Malmö u Stockholm hei gseh, hei mir ä klarä Favorit. Stockholm! Die Stadt isch wunderschön, spannend, ruhig, irgendwie altmodisch u glich modern. Mä cha schiifahrä, ma cha itz Grüenä oder iz Wasser- je nachdäm uf weler Inslä ma grad isch.

Dankbarkeit
Spannendi Begägnige, wunderschöni Usflug, zfrideni Momänte, wärtvoui Erfahrige, gmeinsam Zyt verbringe, Nöis entdeckä, dürehaute, Nachrichte & Bsüech vo daheim, ... Für das aues si mir dankbar.

Elch
Nach wie vor hei mir no nid ds Glück gha amne Elch ir freie Wildbahn ds begägnet. Mir gä aber no nid uf… Regumässig finde mir Elchspure.

Gseh hei mir scho Reh, Fuchs, Hirschä, ä Adler, Hase, Luchspure u grad letscht Wuchä himer äs Wildschwii über ä Fäldwäg gseh secklä.

Fredagsmys
Das isch di schwedischi Art dr Afang vom Wucheänd ds zelebriere. Dr Abe mir dr Familie verbringe und öpis feins Ässe. „Traditionell“ gits Tacos. Aui Zuetate derfür findet me schön sortiert ire äxtra Gsteureihe im Lade- i jedem Läbesmittugschäft, immer.

Godis
Teil Nummer 2 vom Fredagsmys. Mittere Schüssle vou Schläckzüg hockt me vore Fernseh. O ds Beschaffe vo Süessigkeite isch kes Problem. Me findet die schön sortiert ire äxtra Gsteureihe im Lade- i jedem Läbesmittugschäft, immer. Us offne Behäuter schufflet me sech je nach Gusto di Gummivicher ine Papiersack. Voila!

Hüsli
Mitem erste Plätzli hie ds Schwedä heis mir nid grad am beschtä preicht. Ä sehr schöne Platz zwar, aber ä fertigä Löu aus Vermieter. Derfür si mir jtz um so glücklecher am zwöite Ort. Mir gniesse dr Kontakt u d Hiufsbereitschaft vo üser Vermieterfamilie. Chli wehmüetig luege mir am baudige Abschied entgäge...

IKEA
Tatsächlech gseht dr durchschnittlech schwedisch Hushaut us, wi diräkt usem Irichtigskatalog. Vor Familiechuchi, übere Grosisässu bis zum Kafitassli im Restaurant aues us däm Shop. Gärn o d Köttbullar ufem Täuer.

Joggä
Am Afang mit vil Elan ihr Wuchä zmindscht zwümal. Mit dä chürzer wärdändä Tagä isch im glichä Zug o chli d'Luscht druf vrgangä, wil im Fischterä machts würkli ki Früd. Jitz gömer umi regelmässiger- also zmindscht inisch ir Wuchä ;)

Kreditcharte
Aues u jedes wird hie mitem Chärtli zaut. Im düruber geits ar Kasse schneuer, aus we me würd mit Bargäut zahle. Busbilie gits kes, weme es Nötli härestreckt.
Für üs si d Chöste u d Abzüg vor Kreditcharte biuiger, aus we mir am Bankomat würde Bargäut bezieh.

Leggins
Es schint, es wäre superbunt Sportleggins ds witverbreitetste Chleidigsstück überhoupt. Ob bim Ichoufe im Dorfladä, im Chino am Frittiabä oder bim Sunndigsspaziergang- houptsach äng u farbig. Nume dermit jogge hei mir no niemer gseh.

Middagen
Me chönnt meinä, dass heisst zmittagnä. Glub du- es isch Znacht. Me isst hie früech, öpe zwüsche 5i u 6i. Normalerwis isch das di grössti Mahlzit am Tag. Für das me a dä länge Summeräbe nid muss hungere, gits de speter no es sogenannts "kvällsmat".

Nannyjob
Da dass mitem Schaffe ir Pfleg nid het klappet, ha i mir ä angeri Aktivität gsuecht. Zwöi mau ir Wuche ungernime i öpis mit dä Buebe (6i, 4i u 1,5jährig) vore Familie hie ir Nechi. D Eutere schaffe beidi aus Ärzt, d Chinder si ir Schueu u ir Kita. Ig hole se dert ab u verbringe dr Nami mit ihne bis nam Znacht.
Di nächsti Wuche begleite i di Familie nach Sälen i d Schiferiä.

Outdoor
Dr schlächt u näblig Winter het üs chli dinne bhaute. Umsomeh fröie mir üs jtz, dass dr Früehlig chunnt u d Tagä lenger wärde. Mir hei im Sinn, uf üser Reis so viu Zyt wi nur müglech dusse ds verbringe.

Pumuckl
D Wasserpumpi isch gflickt u ds Öl wird no gwächslet. No ä Duschi nachem Winter, packä u när isch dr Puch parat... Mir fröie üs sehr uf das Roadtrip-Abentür.

Qualität
Das isch öpis wo mi bim schaffä ging umi ärgert. Äs isch schwirig dänä eher elterä u langjahrigä Mitarbiiter hütigi Qualitätsasprüch klar z'machä. Wil was vor 50 Jahr het glängt längt, isch hüt ono guet gnug. Leider isch das nät so. Äs wärdä vil Ventil zrugg gschickt. Mischtens ligt das aber am Kund wo vil z'heikel isch ;)

Reiseplaning,
die steit grob. Mir wüsse weli Regione mir i weler Zyt wei erkunde. Die genaue Orte u Aktivitäte tüe mir vorzue plane. Mir müesse ja o öpis ds tüe ha wes rägnet…;)

Svalbard
Woni ha erfahrä, dasmä vo Norwegä us sehr ifach uf Spitzbergä chunnt, hani unbedingt dert härä welä. Das chunnt guet, mir hi im Juni ä chlinä Abstecher uf di Inslä planet. Ischbärä mir chömmä :)

Taxes
Di höche Stüre in Schwedä si fasch so bekannt wie d Elchä. Dr Severin zaut aus usländische Arbeiter 20% vom Lohn i. Jede Monet diräkt abzoge.
Derfür faut füre Schwed jegentlichi Usgabe für Sozialleistige wi Krankekasse u AHV wäg. Für Arztchoste muess me im Jahr max. 3 mau 30 Franke zahle.

Volvo
Hie seit me: "Erwachsä isch mä ersch, wemä Kafi trinkt u ä Volvo het." Mir wärdä glub niä erwachsä :) SAAB <3

Winter
Dr Winter wo mir hie hei erläbt isch so garnid nach Severins Gschmack. Viu Räge u weni Schnee, viu Näbu u weni Wuuchä, viu flach u weni Bärge. Aber o für d Lüt hie isches nid ä normale Winter gsi, aber eine wi är haut cha si i dere Region.

Xundheit
Zum Glück gits zu däm Stichwort gar nüt ds säge ussert dass mir bis jtz kärnxung si u hoffe, dass mir das o blibe.

Yoghurt
Gits gäbigerwis nume im Tetrapack, das heisst immer 1 Liter. Das widerum heisst für us, 2 Wuche ds gliche Joghurt zum Zmorge. Isch aber nid so schlimm, dr Vätu isst ja sit 30 Jahr immer ds gliche Joghurt zum Zmorge ;)