Interroad

Uf üser Hiimfahrt himer nu di inti oder anderi Station agfahrä. Vo Litauä us simer durch Polen, witer dür d'Slowakei u schlussendlich dür Österreich zrugg id Schwiiz.

 

Dr erscht Halt himer ds Warschau gmacht ir Huptstadt vo Polen. Hinder em Puch gseht mä ds höischtä Gebäude vo Polen, dr Kulturhuusturm.

Witer isch üsi Fahrt nach Krakau gangä. Krakau isch di mischt bsuechti Stadt vo Polen. Ufem Bild isch d'Tuchhallä ufem riisigä Marktplatz ir Altstadt.

Das isch dr schrecklickscht Platz womr uf üser ganzä Riis hi bsuecht. Bi däm Bahnglis isch ds Todesurtiil vo meh als ärä Million Lüüt gschribä wordä. Das isch di sogennanti Judenrampe vom Konzentrationslager Auschwitz-Birkenau.

Ir Slowakei hei mier d'Houptstadt Bratislava bsuecht.

Z'Österreich himer endlich umi mal Bärgä gseh. :)

u jtz hi mier umi Schwizer Bodä under dä Füess... bis gli... ;)

Litauen

Ar Westküste si mir vo Lettland uf Litauen igreist.

Üses erste Ziu isch di Kurische Nehrung gsi. Mir hei die per Velo erkundet. Guet 50km dür Kieferwaud u a wunderschöne, verlassne Stränd entlang. Schiins hetts im Summer zimmli Betrib, mir hei aber scho nüt meh dervo gmerkt.  Mir hei di Landschaft u dä Usflug sehr gnosse. Die Kurische Nehrung gränzt a Kaliningrad. Churz nach em Stedli Nida gits ohni Visum kes Witercho.

 

  

Wetterfahne- früecher zur Erkennig vo de Schiff brucht worde.

D`Halbinsle, obe rächts im Biud, ghört scho zu Russland.

Töif im Wald vom Nationalpark Zemaitija isch ä ehemaligi Ragettebasis vor Sowjetunion. Während em Kalte Krieg si dert über Jahre Atomwaffe glageret worde. Das Lager isch so gross gsi, dass mit dene Waffe Europa hätt chönne vernichtet wärde. Es isch so guet versteckt gsi, das d Litauer säuber vo däm Standort über 20 Jahr nüt hei gwüsst. Hüt isch dert es Museum, wo dr Kalt Krieg thematisiert u di Basis erklärt. Sehr ä idrückleche Ort u ä spannendi Gschicht.

Lings im Biud, d Kuppe vom Ragettesilo.

Ragettesilo- 27m töif

Di ganzi Basis isch mitemne 4-fache elektrische Zuunsystem gsicheret gsi. Plus no x Wachpöste u Patrouille.

Plateliaisee

När si mir dür ds Landesinnere gfahre. Mir hei bimne witere spezieue Ort aghaute. Am Berg der Kreuze stö über 500`000 Chrüz i aune Variatione. Litauen giut aus sträng katholisch. Dä Ort söu ihrem starche Gloube und ihrer Nationalität Usdruck verleihe. 

Ds Land isch extrem flach. Mir si a ändlos wiite Fäuder verbi gfahre. Da ds Wätter guet isch gsi, si d Bure mit de grosse Traktore ungerwägs gsi. Mir hei schier a jeder Fuhre ghautet da dr Severin irgend ä Maschine het wöue gneuer aluege... ;)

Kirovets K 700- da chasch de burä :)

Vilnius aus d Houptstadt het o nid dörfe fähle. Mir hei ä schöne Tag ir Autstadt verbracht. Angers aus die beide andere baltische Houptstedt, isch hie ds Biud vor Barockzit prägt. 

Mir fahre witer nach Trakai u gö dert ga d Inselburg besichtige. När verlöh mir Litauen o scho wider u fahre di rästleche 2000 Kilometer. Drücket üs d Düme, dass aues guet geit u mir wi planet heichöme. Mir fröie üs! :) 

Lettland

Über di grüeni Gränze si mir uf Lettland igreist. Aus ersts hei mir üs abem biuige Most gfröit :)

Mir hei ds Sigulda dr Nationalpark Gauja bsuecht. Das isch dr eutisch Nationalpark in Lettland. Dr Park isch bekannt für sini schöne Burge, Kieferwäuder u Sandsteifeuse.

 

ds letzte Fondü uf dr Reis...

Uf Riga ha i mi bsunders gfröit- o wäg dr Stadt, aber vorauem wägem Bsuech.  Mini liebä Studiefründinne si üs cho bsueche. Mir hei es wunderbars Wucheänd verbracht zäme. Hei viu verzeut u glachet, gseh u erläbt, gässe u trunke us eifach gnosse. Schön si dir da gsi!! Riga het üs sehr guet gfaue. Di Stadt het extrem viu Charme.

Schwarzhäupterhaus

Petrikirche

Dom

Pulverturm

Jugendstil- wome häreluegt.

Mir hei ä Usflug gmacht uf Jürmala. Di baltischi Version vor französische Riviera. Dr Severin isch ganz erstuunt gsi, dass me hie o ohni Jeans sünnelet :)

Mir hei ds Riga o imne Airbnb gschlafe. Wo mir zu däm Wohnblock si cho, hei mir üs zerschte mau chli läng agluegt. Zum zwöite mau de, wo mir ds vergheite u schmudlige Stäggehus hei gseh u di doppleti Sicherheitstüre. U zum dritte Mau, wo mir ir früsch renovierte wunderschöne Autbouwohnig si gstande. 

Ds Riga parkiertme so! Wär furt muess, lütet jedem einzelne a. Ds Nummero isch higer dr Windschutzschibe parat.

Nach dene super Täg ds Riga si mir witer dr Küste nah. Ir Kurzeme- Region hei mir di fantastische Sandstränd u herrlechs Summerwätter gnosse. U üs chli gwünscht, di Reis göng nie verbi.... 

Kap Kolka

Zu Sowjetzite het me die Antenne brucht für dr Weste ausdsspioniere. Si het 32 Meter Durchmässer u isch so guet im Waud versteckt, dass mir lang nid si sicher gsi, ob mir sie finde. Hüt wird di Installation zu Forschigszwäcke brucht. 

Mit däm Sunneungergang ar Ostsee hei mir üs vo Lettland verabschidet.