Nordkapp

Nach 10'000 Reisekilometer si mir am nördlichschtä Punkt vo Europa acho. Vo itz a gits zrugg i Südä, also hiimwärts...

Kebnekaise

U scho wider hei mir dörfe Bsuech begrüesse. Ds Kiruna am Flughafe hei mir d Martina abghout u si mit ihre ines waschächts Lapplandabetür itoucht. 
Mir si uf Nikkaloukta gfahre u hei dert üsi Ruckseck packt. Ufem Kungsleden si mir 3 Täg zum Kebnekaise gwanderet. Mit 2110 m.ü.M ds Top of Sweden. Ä soumässig asträngendi, aber wunderschöni Wanderig. 

Gipfufoto ;)

 Stouz dass mirs aui gschafft hei u todmüed si mir am Abe is Zäut verschwunde.

Ufem Camp Alta ir Nechi vo Kiruna hei mir di gmeinsami Wuche la usplampe. Mir hei di Zyt zäme gnosse u üs vo de Wanderigsstrapaze erhout. 

Übrigens: Mir si im tolle Blog vore Wägbegleiterin erwähnt worde. Thanks Sally! https://sallywakelin.wordpress.com/2016/07/09/pyramiden/

Lappland

Ds Tromsö hei mir äs Widersehen dörfe fiire. D Gunilla u dr Bertil, üsi liebe Fründe vo Glimmåkra, si ufere Hurtigrutetour gsi u hei grad am richtige Tag dert agleit. Mir hei aui viu ds verzeue gwüsst u dr Nami isch verbi wi im Flug. Gunilla och Bertil: Tack så mycket för eftermiddagen! Vi ses i Schweiz... :)

Altstadt Tromsö

Eismeerkathedrale

Nach Tromsö si mir witer uf d Insle Somarroy- widermau Karibikfeeling im höche Norde.

Dür d Lyngener Alpen si mir nach Kilpisjärvi gfahre u hei di erste Finnlanderfahrige gmacht. Witer si mir mitts dür ds Rich vo de Sami, dür unändlechi Wälder u Seenä. Lappland pur! 

Lyngener Alpen

wi gseit: Lappland pur!

Svalbard II

Vom 18. Juni bis am 28. Juni hei mir Spitzbergen erkundet. 
 

Akunft Longyearbyen, 78°N

Longyearbyen isch als Bergarbeiterstadt gründet worde u isch hüt dr Houptort vor Inselgruppe. Vo ehemals 7 Kohlegruebe isch hüt no eini in Betrieb. Die meiste vo de 2000 Iwohner läbe hüt vom Turismus. 

Planet isch gsi, dass mir 6 Tag mit Kajak oder ds Fuess ungerwägs si. Für di Tour hei mir ä Füehrer buechet- dr Marcel.  Leider het ds Wätter nid ganz mitgmacht. Mir heis zwar probiert, nid i di planeti Richtig derfür mitem Wind.

Nachtlager am Deltaneset: Isbärewach unger dr Mitternachtssunne

üse Huswal u Wachkumpan;)

Hei am nächste Morge aber müesse umcherä- resp. üs vom Boot la abholä. Dr Wind u d Strömig isch ds starck gsi für ds kajake. Si de no ufene chlini Wanderig für das mir nid erfrüre... simer aber glich fasch...


Mir hei de chli umdisponiert u si derfür uf Bootstoure u ga wandere. Hei dir russischi Sidlig Barentsburg bsuecht. Dert wird nach wi vor Kohle abboue, mitts im Dorf. Di Mine isch i russischem Bsitz, dr Kommunismus prägt ds Dorfbiud.

dr Severin hett es Fahrzüg gfunge wo im würd passe...

Di zwöiti Tour isch nach Pyramiden gsi. Mitem Boot übere Isfjord, zur Gletscherfront u när id Geisterstadt Pyramiden. 

Vogufels Diabas

O dr Polarfuchs het Fröid am Vogufels...

Papageientaucher

Pyramiden isch o ä Bergbousidlig us de 60er Jahr. Nachem Zämebruch vor Sowjetunion het me 1996 di unrentabli Mine gschlosse. Vo ehemaus 1000 Bewohner läbe momentan 7 durhaft in Pyramiden- dä Ort giut somit aus Geisterstadt.

Blick uf Pyramiden vor Kohlegruebe

 

Belugawale

Campingplatz Longyerbyen bi Mitternachtssunne

 

Abflug, Zyt: 03:00