Finnmark inkl. Zwüschefau #3

Mir si mittlerwile ds Finnland acho. Es geit üs guet, mir gniesse üsi erste richtige Summertäg. Aber jtz aues ar Reihe na:
Vo Kiruna si mir wider dür schwedisch Lappland gfahre mitem Ziu "Nordkapp". Mir hei när di ganzi östlechi Finnmarkregion dürquert.

Rentierscheideplatz, normalerwis 2x im Jahr sehr beläbt.

Kyrka Karesuando

Karasjok giut aus dr norwegisch Houptort vo de Sami. Mir si ds Sami-Parlament ga besichtige. Rund 40 Parlementarier debatiere dert über politischi Theme u verträte ihres Volk. Das Parlament het nume ä beratendi Funktion und ke Entscheidigsmacht. Spannend isch o, dass si 3 verschidene Samidialekte redä u enang nid verstöh. Si bruche Übersetzer- obwohl aui Awäsende Norwegisch chönnte...

Sami- Parlament

Dr Parlamentssaal isch i Form vomne Samizäut u d Sitze si mit Rentierläder überzoge.

Lappland pur :)

Bim Porsangerfjord si mir wider uf Meer gstosse. Die wunderschöni Route ar Küste entlang füert a ds Nordkapp. 

Honningsvåg- ds Tor zum Nordkapp

et voilà. plus Mittnatsol.

Ds Nordkapp isch so e richtegi Turistefaue. 30.- Itritt pro Person für dä "magisch" Punkt dörfe ds beträtte. Derzue gits no Ilass zumne Bunker mit Kinoshow, Cafe, Museum u natürlech Souvenirshop. 
Pünktlech für ds Mitternachtsselfie fahre x Reisebuse vor u reihe sich näb de uf hochglanzpolierte dütsche Reisecampere i. Das ganze wird de no vo unzahlige windsensitive Alarmalage musikalisch ungermaut.  Üs isch das irgendeinisch chli ds viu unberüehrti Natur gsi... ;)

Mir si de ds Fuess dr wahrhaftig nördlechst Punkt vo Europa ga erkunde. U hei dert es Fondue u d Rueh gnosse.

Knivskjelodden

Blick ufs Nordkapp

Dr glich Wäg zrugg- oder ämu fasch. Mir hei no ä Abstächer gmacht uf Havøysund. O die Strecki isch üser Meinig nah, zu rächt ä nationali Turisteroute.

i gseh no ä Wal- u dir nid ;)

Havøysund

 

Ändi Juli heis o mir mau richtig chönne i ds Wasser wage. Mir hei dä Badinami u di wahnsinnigi Kulisse sehr gnosse. Ds Wasser isch agnäh war gsi u ungloublech klar.

Silfar Canyon

Das isch aber de o grad dr einzigst warm Tag gsi. Paar Etappe witer ha i nomau d Strumpfhose füregnoh. 
Mir si ar Varangerroute nah bis uf Hamnigberg. Es het gluftet wi verruckt u em Ismeer här entsprächend warm... 
 

Vardø- üsi letzti Hurtigrouteifahrt

 

Kiberg- dr östlechst Punkt vo Norwegen

U dert isches passiert! Mir hei ä Pläddu igfahre. Nachemne Abstächer ufemne Griensträssli het üses Puchi chli Schieflag gha....

Mitem Resärvereife si mir bis i nächst grösser Ort gfahre. Da dä chli grösser isch aus di andere, hei mir müglechst schnäu Ersatz brucht. Mir hei paar Garage müesse abklappere hei aber tatsächlech am 10vor4i ä Reife gfunge wo passt. Da isch churzum uf d Fäuge ufzoge gsi u bis uf ds Zahle parat. Da isch dr Zwüschefau # 3.2 zum Zug cho:

!!

Tja, mir hei bis am angere Morge müesse warte für mis Täschli mit Kreditchärtli, etc. chönne abdshole. Vo dert a isches aber när ke Sach meh gsi. 200.- u 15 Minute speter isch das Rad montiert gsi u mir wider reisebereit. 

Mir si wider am Varangerfjord nah zrugg und nach Tana bru über di norwegisch- finnischi Gränze.